ಸಮಯದ ಅಭಾವ

ಬಹಳ ದಿನಗಳ ನಂತರ
ಕವನ ಬರೆಯುವ ಆಸೆಯು
ಮೊದಲಿನಂತೆ ಸ್ಫೂರ್ತಿಯಿಲ್ಲ
ಏನು ಆಗಿದೆ ಕೊರತೆಯು?

ಬೆಳಗಿನಿಂದ ಸಂಜೆವರೆಗೂ
ಕೆಲಸವದು ನಿರಂತರ
ಮನೆಗೆ ಬಂದು ಬರೆಯುವಷ್ಟು
ಸಹನೆಯಿಲ್ಲ ನಂತರ.

ಏಕತಾನತೆಯಿಂದ ಜೀವನ
ಸಾಗುತಿರಲು ನಿತ್ಯವೂ
ಮಿಕ್ಕ ಸಮಯದಿ ನಡೆಯಬೇಕಿದೆ
ನಮ್ಮ ಬಾಳಿನ ಚಕ್ರವು.

ಪ್ರಶ್ನೆ

ನಿನ್ನೊಲುಮೆ ಪಡೆಯಲಿಕೆ
ನಿನ್ನೆದೆಯ ಗೆಲ್ಲಲಿಕೆ
ನನ್ನೆದೆಗೆ ತವಕವೇಕೆ?

ಚೆಲುವೆ

ನಗುಮುಖದ ಚೆಲುವೆ ನೀ
ಹಗುರಾಗಿ ಬಳಿ ಬಂದೆ
ಮಗುವಾದೆ ನಿನ್ನೊಲವಿಗೆ.

ಜೀವ

ಮಳೆಹನಿಯು ಸೋಕಿರಲು
ಅವಿತಿದ್ದ ಬೀಜವದು
ಮೊಳಕೆಯೊಡೆದು ಜೀವವಾಯ್ತು

ನೋವು

ನೋವಿರುವುದು ತುಂಬಾ
ನಮ್ಮ ಎದೆಯೊಳಗೆ
ಚೀರುತಿಹುದು ನಿತ್ಯ
ಕೇಳುವವರಿಲ್ಲದೆ.

ಜೀವನವು ದಿನನಿತ್ಯ
ಹೋರಾಟದ ಹಾದಿಯು
ನೋವುಗಳು,ಗಾಯಗಳು
ಹೊಸದಲ್ಲ ನಮಗೆ.

ಆಸೆಕಂಗಳ ಕನಸು
ನನಸಾಗದಿರೆ ಬೇಗ
ನೊಂದುಕೊಂಡರು ಹೃದಯ
ಇಲ್ಲ ಉಪಯೋಗ.

ನಾವಂದುಕೊಂಡಂತೆ
ನಡೆವುದಿಲ್ಲ ಇಲ್ಲಿ
ಮುದುರಿಹೋದರೆ ನಾವು
ಜಾಗವಿಲ್ಲ ಜಗದಲ್ಲಿ.

ಹೊಸ ಆಸೆ, ಹೊಸ ಕನಸು
ಇರಲಿ ನಮ್ಮೊಡನೆ
ಮತ್ತೆ ಮುನ್ನಡೆಯುವ
ನನಸಾಗಿಸುವೆಡೆಗೆ.